angDai par angDai leti hai raat judai ki
tum kya samjho tum kya jaano baat meri tanhai ki

Qateel Shifai

---

---

aaKHri hichki tere zanun pe aae
maut bhi main shairana chahta hun

Qateel Shifai

---

---

aaya hi tha abhi mere lab pe wafa ka nam
kuchh doston ne hath mein patthar uTha liye

Qateel Shifai

---

---

ab jis ke ji mein aae wahi pae raushni
hum ne to dil jala ke sar-e-am rakh diya

whoever so desires may now partake of its heat
for I have set my heart afire and left it on the street

Qateel Shifai

---

---

abhi to baat karo hum se doston ki tarah
phir iKHtilaf ke pahlu nikalte rahna

Qateel Shifai

---

---

achchha yaqin nahin hai to kashti Duba ke dekh
ek tu hi naKHuda nahin zalim KHuda bhi hai

Qateel Shifai

---

---

ahbab ko de raha hun dhoka
chehre pe KHushi saja raha hun

Qateel Shifai

---

---

apne liye ab ek hi rah najat hai
har zulm ko raza-e-KHuda kah liya karo

Qateel Shifai

---

---

apni zaban to band hai tum KHud hi soch lo
paDta nahin hai yunhi sitam-gar kisi ka nam

Qateel Shifai

---

---