main masiha use samajhta hun
jo mere dard ki dawa na kare

Muztar Khairabadi

---

---

main nahin hun naghma-e-jaan-faza mujhe sun ke koi karega kya
main baDe birog ki hun sada main baDe dukhi ki pukar hun

Muztar Khairabadi

---

---

main teri rah-e-talab mein ba-tamanna-e-visal
mahw aisa hun ki miTne ka bhi kuchh dhyan nahin

Muztar Khairabadi

---

---

masiha ja raha hai dauD kar aawaz do 'muztar'
ki dil ko dekhta ja jis mein chhaale paDte jate hain

Muztar Khairabadi

---

---

mera dil-e-'muztar' but-e-kafir se laga hai
aur aankh meri su-e-KHuda dekh rahi hai

Muztar Khairabadi

---

---

mera rang rup bigaD gaya mera yar mujh se bichhaD gaya
jo chaman KHizan se ujaD gaya main usi ki fasl-e-bahaar hun

Muztar Khairabadi

---

---

mere ashkon ki rawani ko rawani to kaho
KHair tum KHun na samjho ise pani to kaho

Muztar Khairabadi

---

---

mere ghubar ki ye talli to dekhiye
itna baDha ki arsh-e-mualla se mil gaya

Muztar Khairabadi

---

---

meri arman bhari aankh ki tasir hai ye
jis ko main pyar se dekhunga wahi tu hoga

Muztar Khairabadi

---

---