na dekhe honge rind-e-la-ubaali tum ne 'beKHud' se
ki aise log ab aankhon se ojhal hote jate hain

Bekhud Dehlvi

---

---

mujh ko na dil pasand na wo bewafa pasand
donon hain KHud-gharaz mujhe donon hain na-pasand

Bekhud Dehlvi

---

---

munh pher kar wo kahte hain bas man jaiye
is sharm is lihaz ke qurban jaiye

Bekhud Dehlvi

---

---

munh mein waiz ke bhi bhar aata hai pani aksar
jab kabhi tazkira-e-jam-e-sharab aata hai

Bekhud Dehlvi

---

---

mohabbat aur majnun hum to sauda is ko kahte hain
fida laila pe tha aankhon ka andha is ko kahte hain

Bekhud Dehlvi

---

---

mila ke KHak mein sarmaya-e-dil-e-'beKHud'
wo puchhte hain batao ye mal kis ka tha

Bekhud Dehlvi

---

---

mera har sher hai ek raaz-e-haqiqat 'beKHud'
main hun urdu ka 'naziri' mujhe tu kya samjha

Bekhud Dehlvi

---

---

maut aa rahi hai wade pe ya aa rahe ho tum
kam ho raha hai dard dil-e-be-qarar ka

Bekhud Dehlvi

---

---

mahfil wahi makan wahi aadmi wahi
ya hum nae hain ya teri aadat badal gai

Bekhud Dehlvi

---

---