kya kah diya ye aap ne chupke se kan mein
dil ka sambhaalna mujhe dushwar ho gaya

Bekhud Dehlvi

---

---

teri tegh ka lal kar dunga munh
jo ye khelne mujh se aaegi rang

Bekhud Dehlvi

---

---

tir-e-qatil ko kaleje se laga rakkha hai
hum to dushman ko bhi aaram diye jate hain

Bekhud Dehlvi

---

---

takiya haTta nahin pahlu se ye kya hai 'beKHud'
koi botal to nahin tum ne chhupa rakkhi hai

Bekhud Dehlvi

---

---

sun ke sari dastan-e-ranj-o-gham
kah diya us ne ki phir hum kya karen

Bekhud Dehlvi

---

---

sawal-e-wasl par kuchh soch kar us ne kaha mujh se
abhi wada to kar sakte nahin hain hum magar dekho

Bekhud Dehlvi

---

---

sauda-e-ishq aur hai wahshat kuchh aur shai
majnun ka koi dost fasana-nigar tha

Bekhud Dehlvi

---

---

saKHt-jaan hun mujhe ek war se kya hota hai
aisi choTen koi do-chaar to aane dije

Bekhud Dehlvi

---

---

ind-mashrab koi 'beKHud' sa na hoga wallah
pi ke masjid hi mein ye KHana-KHarab aata hai

Bekhud Dehlvi

---

---