kyun na apni KHubi-e-qismat pe itraati hawa
phul jaise ek badan ko chhu kar aai thi hawa

Abid Munavari

---

---

agarche zor hawaon ne Dal rakkha hai
magar charagh ne lau ko sambhaal rakkha hai

Ahmad Faraz

---

---

kaun taqon pe raha kaun sar-e-rahguzar
shahr ke sare charaghon ko hawa jaanti hai

Ahmad Faraz

---

---

hawa sahla rahi hai us ke tan ko
wo shoala ab sharare de raha hai

Akbar Hameedi

---

---

zara haTe to wo mehwar se TuT kar hi rahe
hawa ne nocha unhen yun ki bas bikhar hi rahe

Ali Akbar Abbas

---

---

hawa ho aisi ki hindostan se ai 'iqbaal'
uDa ke mujh ko ghubar-e-rah-e-hijaz kare

Allama Iqbal

---

---

hawa daraKHton se kahti hai dukh ke lahje mein
abhi mujhe kai sahraon se guzarna hai

Asad Badayuni

---

---