Virana-e-KHayal

dasht-e-garm-o-sard mein ye be-dayaron ka hujum
be-KHabar mahaul se

chup-chap
KHud se ham-kalam

chal raha hai sar jhukae is tarah
jis tarah marghaT pe ruhon ka KHiram

zard chehron par hai sadiyon ki thakan
sans lete hain kuchh aise

jaise hoti ho chubhan
honT par ghamgin tabassum aur sine mein buka

har qadam par haDDiyon ke kaDkaDane ki sada
un ki aankhen

jin pe hukm-e-dida-e-bina lagate hain
dewtaon ki basirat kanp jae

zehn o dil ka fasla tai karte karte hanp jae
wusat-e-arz-o-sama ek dida-e-hairan hai

uf! ye mela kis qadar viran hai!!