Shaffafiyan

hamein tum muskurahaT do
tumhein hum khilkhilate roz o shab denge

ye kaise ho
ki tum bauchhaD do

to hum tumhein jal-thal na de den
aur sahraon ko farsh-e-ab na kar den

hamara dhyan rakho tum
tumhein duniya mein rakhenge hum apni aarzuon ki

ye kaise ho
ki tum socha karo

aur hum tumhaari soch ko tajsim na kar den
murawwaj chahaton ke

be-lachak aain mein tarmim na kar den
tumhein ye bhi batate hain

agar koi KHalish hai ya koi ibham hai dil mein
to phir aage nahin baDhna

ki hum shaffaf hain
shaffafiyan hi chahte hain

be-nazar shishon mein apne aks ko maila nahin karte
tumhein ye bhi batate hain

agar tum chhab dikha ke chhup gae
to hum tumhein DhunDenge chahe aap kho jaen

agar tum kahkashan maskan banaoge
to hum bhi raushni-zade hain

suraj ke pujari hain
hum aise sab sitare toD dete hain

jo hum se raushni ki bhik bhi lete hain
aankhon mein bhi chubhte hain

agar patal mein chhupne ki koshish ki
to phir ai sim-tan!

dharti hamare waste sona ugalti hai
bhala chandi kahan is mein Thaharti hai

hamari rah mein
shisha-numa pani ki jhilen mat bichhana tum

ye kankar phenk kar hi faisla hoga
ki us pahnai mein kashti utarti hai

ya phir hum panw dharte hain
magar aisa na karna tum

ki hum aisa hi karte hain