پہلے فن دست و گریباں ہیں کراں تا بہ کراں

پہلے فن دست و گریباں ہیں کراں تا بہ کراں
سرنگوں بیٹھی ہوئی ہے خاک پر اردو زباں

کشتیٔ اردو زباں کے ناخداؤ کیا ہوا
علم و فن شعر و سخن کے رہنماؤ کیا ہوا

کیا ہوئی وہ عظمتیں کچھ تو بتاؤ کیا ہوا
پیچھے ہٹتی جا رہی کیوں صف چاراگراں

سرنگوں بیٹھی ہوئی ہے خاک پر اردو زباں
دیکھیے جس کو بھی اب تو ہم سر غالب ہے وہ

شاعر اعظم ہے اور اعزاز کا طالب ہے وہ
ہے غلط گو پھر بھی ہر اک صنف میں صائب ہے وہ

لکھ رہا ہے خود ہی اپنی عظمتوں کی داستاں
سرنگوں بیٹھی ہوئی ہے خاک پر اردو زباں

نمبروں سے اور گوشوں سے رسائل بھر گئے
اس زوال علم سے خود علم والے ڈر گئے

نقل نے بازار لوٹا اصل اپنے گھر گئے
بے ادب لوگوں نے کھولی ہے ادب کی اک دکاں

سرنگوں بیٹھی ہوئی ہے خاک پر اردو زباں