Na-KHalaf mizaj ki musaddaqa taslimat

mere badan ki chaar diwari ke liye
khanakti hui miTTi kam thi

is liye KHuda ne aankhon mein kanch bhar diya
aur jahannam ke lapakte hue shoalon ki jalan lahu mein rakh di

mere hathon mein laq-o-daq sahraon ki retili wahshat
chabae hue aks ki lakiren banati rahti hai

aur zehn ke riste hue patile mein
din bhar bardasht ka lawa khaulta hai

log apne andazon ki jutiyan
mere ehsas ke darwaze pe utarte hain

aur kufr ki masjid mein nange panw chale aate hain
main apni zat mein itni mutassib hun ki

lahjon ko un ke maslak se pahchanti hun
aur kisi ba-murawwat KHanqah mein

majburi ka sajda nahin karti
koi ghaliz muskurahaT meri aankhon ko chhuna chahe to

main honTon pe thuk deti hun
lekin sadqa-e-jariya ka surKH rumal ungli pe nahin bandh sakti