Zindagi kya hai ek manzar hai

zindagi kya hai ek manzar hai
ret hai tishnagi hai kikar hai

aap behad hasin hain lekin
dil to yaqut ka bhi patthar hai

ek taswir meri aankhon ki
ek taswir mein samundar hai

saya-e-atifat mein rahta hun
gham tera rahaton se baDh kar hai

aap kyun der se khaDe hain yahan
aaiye pas hi mera ghar hai

kucha-e-zat mein bhaTakta hun
aap ka rasta to az-bar hai

sansani aahaTon se pahle thi
KHauf KHamoshiyon ka mazhar hai

ek taswir mein jiye hum log
zindagi bhi ajib manzar hai

main sitara-mizaj hun 'rahil'
jagna hi mera muqaddar hai