zindagi KHwab ki tarah dekhi
naw girdab ki tarah dekhi
meri uryaniyon ko Dhanp liya
gard kam-KHwab ki tarah dekhi
umr bhar chheDti rahi hum ko
sans mizrab ki tarah dekhi
raste ki thakan bhi kandhe par
mal-o-asbab ki tarah dekhi
ishq ne us ko rakh kar Dala
barf tezab ki tarah dekhi
gharq ho ho gae pasine mein
dhup sailab ki tarah dekhi
hum ne zinda-dili 'muzaffar' mein
ahl-e-punjab ki tarah dekhi
Ghazal
Zindagi KHwab ki tarah dekhi
Muzaffar Warsi