zamin ke jism pe yun yurish-e-qaza kab tak
falak-nashinon yunhi gham ka silsila kab tak
abhi se uThne lage hain sawal ke lashkar
to phir ai raqs-e-fusun shor-e-be-sada kab tak
sitare apni ziya ka libas de na sake
urus-e-shab ke badan par phaTi rida kab tak
tamam umr lahu ka KHiraj baKHshenge
rahega tauq-o-salasil se wasta kab tak
hawaen shaKH-e-falak se sada lagati hain
ghubar-e-rah mein rah paegi ana kab tak
sukut-e-sham se ghabra na ai shafaq-tabi
ruka rahega bhala shab ka qafila kab tak
likho bhi lamha-e-be-tan pe zindagi 'amir'
likhoge apne muqaddar ka marsiya kab tak
Ghazal
Zamin ke jism pe yun yurish-e-qaza kab tak
Amir Nazar