زخم سینے پہ لگا آنکھ سے آنسو نکلے
غم کی آہٹ سے کئی درد کے آہو نکلے
حلقۂ ریگ رواں دشت کے دریا کا بھنور
وحشت دل کے سفینے میں اگر تو نکلے
بد گمانی کی نگاہوں سے جو دیکھا ہے تجھے
تیری ہر بات میں سو طرح کے پہلو نکلے
مہک اٹھے یہ بیاباں بھی گلستاں کی طرح
قید گلزار سے آزاد جو خوشبو نکلے
اس کڑی دھوپ میں تھا کس کو سفر کا یارا
ہر قدم سایہ کناں کاکل و گیسو نکلے
سحر گل کارئ احساس کا باعث ہیں ندیمؔ
دل میں جو تیر غم جاں کے ترازو نکلے
غزل
زخم سینے پہ لگا آنکھ سے آنسو نکلے
صلاح الدین ندیم