Yun sitam Dhae gae hain tere diwane par

yun sitam Dhae gae hain tere diwane par
zaKHm KHud girya-kunan hai mere afsane par

mujh ko yaksar hi alag rahna paDa hai tum se
aisa hota hai kahin ishq ke mar jaane par

pahle yak-laKHt chale aate the milne ke liye
ab tawajjoh bhi nahin hai mere chillane par

sozish-e-gham ka charaghon ko kahan andaza
raat chiKH uThti hai jalte hue parwane par

main samajhta tha mera dil hai meri manega
usi kafir ka hua jata hai samjhane par

dard-e-furqat hi meri maut ka saman hai 'qamar'
dil kisi taur bahalta nahin bahlane par