ye kahna tha jo duniya kah rahi hai
ye ganga kab se ulTi bah rahi hai
KHabar hai KHwab TuTega yaqinan
magar ek faKHta dukh sah rahi hai
lagi thi us ki buniyaadon mein dimak
so ab dil ki imarat Dhah rahi hai
kahin ye KHushk ho jae na sathi
mere dil mein jo nadiya bah rahi hai
sitara band muTThi mein milega
meri taqdir mujh se kah rahi hai
mere dil ke akele ghar mein 'rahat'
udasi jaane kab se rah rahi hai
Ghazal
Ye kahna tha jo duniya kah rahi hai
Humaira Rahat