ye hausla tujhe mahtab-e-jaan hua kaise
ki KHud ko sae se minha kiya bata kaise
nazar to kya ki ye mina-e-dil bhi KHali hai
lagega shahr mein bazar-e-KHun-baha kaise
mujhe KHabar hai ki mausam nahin ye KHwahish ka
mere labon pe ye Thahra hai zaiqa kaise
KHudai nauha-kunan thi ki aaj mimbar pe
ye tujh ko aaya nazar kya mere siwa kaise
talluqat ke tawiz bhi gale mein nahin
malal dekhne aaya hai rasta kaise
qafas mein meri panahon ko dekh hairan tha
ki mere dil mein tha maqtal ka zaicha kaise
hawa se jaise charaghon ki lau bhaDakti hai
bahut dinon mein tujhe dekh ke hansa kaise
Ghazal
Ye hausla tujhe mahtab-e-jaan hua kaise
Kishwar Naheed