wo rang-e-ruKH wo aatish-e-KHun kaun le gaya
ai dil tera wo raqs-e-junun kaun le gaya
zanjir aansuon ki kahan TuT kar giri
wo intiha-e-gham ka sukun kaun le gaya
dard-e-nihan ke chhin liye kis ne aaine
nok-e-mizha se qatra-e-KHun kaun le gaya
jo mujh se bolti thin wo raaten kahan gain
jo jagta tha soz-e-darun kaun le gaya
kis moD par bichhaD gae KHwabon ke qafile
wo manzil-e-tarab ka fusun kaun le gaya
jo shama itni raat jali kyun wo bujh gai
jo shauq ho chala tha fuzun kaun le gaya
Ghazal
Wo rang-e-ruKH wo aatish-e-KHun kaun le gaya
Khalilur Rahman Azmi