Wo kya zindagi jis mein joshash nahin

wo kya zindagi jis mein joshash nahin
wo kya aarzu jis mein kawish nahin

junun aaina-dar-e-soz-e-darun
junun par KHushi ki nawazish nahin

muqaddar ka marhun-e-minnat hai ye
tera martaba wajh-e-nazish nahin

haqiqat ka akkas mera kalam
tasanno nahin is mein koshish nahin

ye izhaar-e-sada hai jazbaat ka
kamal-e-hunr ki numaish nahin

zamane se hun be-niyaz is qadar
sataish ki bhi dil mein KHwahish nahin

ye kya ho gaya tere maktub mein
talluq ka rang-e-nigarish nahin

use mil sake kaamyabi kahan
madad-gar jis ki sifarish nahin

wo be-bak aazad-guftar hai
kabhi 'kirshn' mohan ko bandish nahin