wafa KHulus mohabbat ibaadaten us ki
bhula na paunga yaro mohabbaten us ki
qadam qadam pe mujhe jis ne hausla baKHsha
charagh-e-rah bani hain nasihaten us ki
har ek moD pe us ne mujhe sambhaala hai
main KHush-nasib ki paen rifaqaten us ki
hai kuchh to baat yaqinan ki log kahte hain
yunhi nahin hain zamane mein shohraten us ki
Ghazal
Wafa KHulus mohabbat ibaadaten uski
Saifi saronji