Wada-o-qaul-o-qasam ne mujhe jine na diya

wada-o-qaul-o-qasam ne mujhe jine na diya
kya sitam hai ki karam ne mujhe jine na diya

dil to aamada-e-gham tha ba-in barbaadi-e-jaan
magar andaza-e-gham ne mujhe jine na diya

naz-bardar-e-sawal-e-dil-e-pur-KHun na mila
kasa-e-dida-e-nam ne mujhe jine na diya

tu jafa-pesha hai kis munh se kahun duniya se
apni chahat ke bharam ne mujhe jine na diya

ek nadida KHuda ne mere nale na sune
ek patthar ke sanam ne mujhe jine na diya

ek sae ka karam hai tapish-e-jaan pe hanuz
ek diwar ke KHam ne mujhe jine na diya

sher likhta hun ki taqdir-e-tamanna ai 'shaz'
hunar-e-lauh-o-qalam ne mujhe jine na diya