us ne apna liya to Thahra main
wo samundar hai aur dariya main
us ki wusat mein wusaten meri
us ki gahraiyon mein gahra main
sang barse ki phul mat puchho
TuTna tha mujhe so TuTa main
ham-nashin kya jo ham-KHayal nahin
anjuman anjuman hun tanha main
rabt-e-guft-o-shunid ho to khule
log gunge hain ya hun bahra main
ab na jazba na aarzu na umid
bin diwanon ka ek sahra main
yaad rakhna hi na-guzir hai kyun
kabhi tujh ko bhula bhi sakta main
Ghazal
Usne apna liya to Thahra main
Izhar Varsi