اس بت سے مل کر اس دل ناداں کو کیا ہوا

اس بت سے مل کر اس دل ناداں کو کیا ہوا
کیوں آہ و زاری ہے لب خنداں کو کیا ہوا

دیوانے اپنا چاک گریباں تو سی چکے
اب تک نہ آئی فصل بہاراں کو کیا ہوا

دونوں جہاں ہیں منتظر روز حشر پھر
اس شوخ چشم فتنۂ دوراں کو کیا ہوا

پھولوں میں کوئی بو ہے نہ کلیوں میں تازگی
اے عندلیب رنگ گلستاں کو کیا ہوا

دل میں وہی خلش ہے وہی اضطراب ہے
چارہ گروں کے دعوۂ درماں کو کیا ہوا

دل پوچھتا ہے آج بھی وہ رشک نو بہار
آیا نہ اس کے وعدہ و پیماں کو کیا ہوا

کرتے ہو آج کفر کی باتیں جگہ جگہ
آفتؔ تمہارے دین کو ایماں کو کیا ہوا