un ko ruswa mujhe KHarab na kar
ai dil itna bhi iztirab na kar
aamad-e-yar ki ummid na chhoD
dekh ai aankh mail-e-KHwab na kar
mil hi rahti hai mai-parast ko mai
fikr-e-na-yabi-e-sharab na kar
naseha hum karenge sharh-e-junun
dil-e-diwana se KHitab na kar
shauq yaron ka be-shumar nahin
sitam ai dost be-hisab na kar
dil ko mast-e-KHayal-e-yar bana
lab ko aaluda-e-sharab na kar
rakh bahar-haal shughl-e-mai 'hasrat'
is mein parwa-e-sheKH-o-shab na kar
Ghazal
Un ko ruswa mujhe KHarab na kar
Hasrat Mohani