tumhaari wapsi hone ka andaza na ho jae
kahin bikhri hui miTTi tar-o-taza na ho jae
farishton tum ne be aawaz andeshe nahin dekhe
yahi diwar aage baDh ke darwaza na ho jae
baDi KHwahish hai phir se zindagi hamwar karne ki
magar us se kahin mismar shiraaza na ho jae
abhi tak to natija bhi pas-e-diwar hai jaanan
teri is mahwiyat se kal ka andaza na ho jae
shabahat pe adakari asar-andaz hoti hai
abhi tak to ye chehra hai kahin ghaza na ho jae
Ghazal
Tumhaari wapsi hone ka andaza na ho jae
Ahmad Kamal Parwazi