تجھے بھی جانچتے اپنا بھی امتحاں کرتے

تجھے بھی جانچتے اپنا بھی امتحاں کرتے
کہیں چراغ جلاتے کہیں دھواں کرتے

کئی تھے جلوۂ نایاب تجھ سے پہلے بھی
کس آسرے پہ ترا نقش جاوداں کرتے

سفینہ ڈوب رہا تھا تو کیوں نہ یاد آیا
تری طلب ترے ارماں کو بادباں کرتے

محبتیں بھی تری ہیں شکایتیں بھی تری
یقین تجھ پہ نہ ہوتا تو کیوں گماں کرتے

ہوا تھی تیز جلاتے رہے دلوں میں چراغ
کٹی ہے عمر لہو اپنا رائیگاں کرتے

وہ بے جہت کا سفر تھا سواد شام نہ صبح
کہاں پہ رکتے کہاں یاد رفتگاں کرتے

دیار خواب میں ٹھہرے حصار گل میں رہے
مگر یہ غم ہی رہا خود کو شادماں کرتے