Tishnagi achchhi nahin rakhna bahut

tishnagi achchhi nahin rakhna bahut
rauzan-e-gul se use takna bahut

dekh kar jis shaKHs ko hansna bahut
sar ko is ke samne Dhakna bahut

jis ki aankhon mein na jhanka jaega
is ki hi tahrir ko paDhna bahut

mauja-e-reg-e-rawan hai zer-e-ab
apni hasti dekh kar baDhna bahut

barf ki manind jina umr bhar
ret ki surat magar tapna bahut

umr bhar ki bandishen KHwab-o-KHayal
do qadam bhi sath hai chalna bahut

KHastagi 'nahid' ban jae na jurm
apni hasti dekh kar baDhna bahut