ترا آسماں ناوکوں کا خزینہ حیات آفرینا حیات آفرینا

ترا آسماں ناوکوں کا خزینہ حیات آفرینا حیات آفرینا
ہماری زمیں لعل و گل کا دفینہ حیات آفرینا حیات آفرینا

ہوئے نام اور ننگ سب غرق صہبا مری مے گساری کی ہوگی سزا کیا
ترے نام کا ایک جرعہ یہی نا حیات آفرینا حیات آفرینا

ترے وعدۂ رزق کی ہے دہائی اگر رزق آزوقۂ روح بھی ہے
تو ہم تو ہیں محروم نان شبینہ حیات آفرینا حیات آفرینا

نہ سانسوں میں جوش نمو کا تلاطم نہ مرنے کے غم میں گداز تألم
یہ جینا بھی ہے کوئی جینے میں جینا حیات آفرینا حیات آفرینا

زمیں کا کلیجہ بہت پھنک رہا ہے فلک پھٹ پڑے قلزم خوں رواں ہو
جبین مشیت سے ٹپکے پسینہ حیات آفرینا حیات آفرینا

مہ و مہر و انجم فلک کے دلارے تری مملکت کے حسیں شاہزادے
ہماری زمیں کائناتی حسینہ حیات آفرینا حیات آفرینا

نہیں اخترؔ زار مایوس خود سے کہ ظلمت بھی چھٹتی ہے درجہ بہ درجہ
اترتی ہے رحمت بھی زینہ بہ زینہ حیات آفرینا حیات آفرینا