Tere liye ijad hua tha lafz jo hai ranai ka

tere liye ijad hua tha lafz jo hai ranai ka
sar se le kar naKHun-e-pa tak aalam hai zebai ka

dil ki virani ne itna zauq-e-samaat badla hai
gham ki lai mein Dhal jata hai naghma KHud shahnai ka

chaaron taraf sailab-e-adam phir bhi akela hun jaise
dhire dhire kha jaega zahr mujhe tanhai ka

husn ke kashana mein aa kar sar ko jhukana paDta hai
ishq ka banda ho kar tujh ko zauq hai kyun darai ka

mehnat sab se baDi ibaadat mehnat-kash meamar-e-qaum
ahd-e-nau aaghaz hua hai KHatm hai daur shahi ka

ranj-o-KHushi 'sartaj' baham hain ye duniya ki mahfil hai
gham ki tanen kahin pe jagen shor kahin shahnai ka