sun andalib-e-chaman sogwar hum bhi hain
kisi ke tir-e-nazar ka shikar hum bhi hain
nazar phira ke pilate ho har taraf saghar
nigah-e-mast ke ek baada-KHwar hum bhi hain
wo aa ke mahfil-e-rindan mein hain jo dosh-ba-dosh
to aaj bazm mein diwana-war hum bhi hain
wo misl-e-ghuncha jo mahke hue hain pahlu mein
KHuda ka shukr ki rang-e-bahaar hum bhi hain
bataen kya tumhein 'taslim' raaz maKHfi hai
kisi ki kakul-o-ruKH pe nisar hum bhi hain
Ghazal
Sun andalib-e-chaman sogwar hum bhi hain
Jameela Khatoon Tasneem