sitam wo tum ne kiye bhule hum gila dil ka
hua tumhaare bigaDne se faisla dil ka
bahaar aate hi kunj-e-qafas nasib hua
hazar haif ki nikla na hausla dil ka
chala hai chhoD ke tanha kidhar tasawwur-e-yar
shab-e-firaq mein tujh se tha mashghala dil ka
wo rind hun ki mujhe hatkaDi se baiat hai
mila hai gesu-e-jaanan se silsila dil ka
wo zulm karte hain hum par to log kahte hain
KHuda bure se na Dale muamla dil ka
hazar fasl-e-gul aae junun! wo josh kahan
gaya shabab ke ham-rah walwala dil ka
KHuda ke hath hai ab apna ai 'qalaq' insaf
buton se hashr mein hoga muamla dil ka
Ghazal
Sitam wo tumne kiye bhule hum gila dil ka
Arshad Ali Khan Qalaq