silsile KHwab ke ashkon se sanwarte kab hain
aaj dariya bhi samundar mein utarte kab hain
waqt ek mauj hai aata hai guzar jata hai
Dub jate hain jo lamhat ubharte kab hain
yun bhi lagta hai teri yaad bahut hai lekin
zaKHm ye dil ke teri yaad se bharte kab hain
lahar ke samne sahil ki haqiqat kya hai
jin ko jina hai wo haalat se Darte kab hain
ye alag baat hai lahje mein udasi hai 'shamim'
warna hum dard ka izhaar bhi karte kab hain
Ghazal
Silsile KHwab ke ashkon se sanwarte kab hain
Farooq Shamim