shoKHi se kashmakash nahin achchhi hijab ki
khul jaegi girah tere band-e-naqab ki
shishe khule nahin abhi saghar chale nahin
uDne lagi pari ki tarah bu sharab ki
do din ki zindagi pe ilahi ye ghaflaten
aankhen to hain khuli hui haalat hai KHwab ki
hote hi subh-e-wasl ki shab dekhta hun kya
talwar ban gai hai kiran aaftab ki
aata nahin kasi pe dil-e-bad-guman 'aziz'
jamti nahin kasi pe nazar intiKHab ki
Ghazal
ShoKHi se kashmakash nahin achchhi hijab ki
Aziz Hyderabadi