Shikast-e-rang-e-tamanna ko arz-e-haal kahun

shikast-e-rang-e-tamanna ko arz-e-haal kahun
sukut-e-lab ko taqaza-e-sad-sawal kahun

hazar ruKH tere milne ke hain na milne mein
kise firaq kahun aur kise visal kahun

mujhe yaqin hai ki kuchh bhi chhupa nahin un se
unhen ye zid ki dil-e-mubtala ka haal kahun

tu be-misal sahi phir bhi dil ko hai israr
ada ada ko teri aalam-e-misal kahun

mizaj-e-mahfil-e-giti agar na barham ho
to rang-e-aish ko gard-e-ruKH-e-malal kahun

hawa ke dosh pe hai ek shola-e-larzan
kahun to kya teri tahzib ka maal kahun

wo ek KHwab jo tamir aap hai apni
main kya haqiqat-e-ranai-e-KHayal kahun

ghazal ki baat rahegi wahin agar sau bar
jawab-e-shoKHi o ranai-e-ghazal kahun

'rawish' ye sadgi-e-ishq ka taqaza hai
kamal-e-hosh ko iKHlas ka zawal kahun