Shajar shajar nigaran hai kali kali bedar

shajar shajar nigaran hai kali kali bedar
na jaane kis ki nigahon ko DhunDti hai bahaar

kabhi fughan bhi nashat-o-tarab ka afsana
kabhi hansi bhi taDapte hue dilon ki pukar

na jaane kis ki nashat-e-qadam se hain mahrum
ki ek umr se sune paDe hain rahguzar

hazar haar kisi chashm-e-ashna ke tufail
ujaD ujaD ke base hain mohabbaton ke dayar

ajib haal hai betabi-e-mohabbat ka
shab-e-visal ki rahat mein DhunDti hai qarar

ye barq-e-husn aur us par ye teri KHu-e-hijab
ye sail-e-ishq aur is par nazar nazar ka shumar

hai in ki pursish-e-dard-o-alam mein bhi pinhan
wo ek kasak ki samajhte nahin jise gham-KHwar