shahr-e-dil phir mera viran hua jata hai
ghar ki barbaadi ka saman hua jata hai
ghaaliban phir nai uftad paDi hai dil par
sans bhi nuh ka tufan hua jata hai
teri har baat se girta hai kaleja kaT kar
tera har lafz to paikan hua jata hai
hijr ki raat to karwaT mein guzar jati hai
aur din bhi bahut aasan hua jata hai
sara gham meri hi qismat mein likha hai 'saifi'
dil mera 'mir' ka diwan hua jata hai
Ghazal
Shahr-e-dil phir mera viran hua jata hai
Muneer Saifi