shairi ruh mein tahlil nahin ho pati
hum se jazbaat ki tashkil nahin ho pati
hum mulazim hain magar thoDi ana rakhte hain
hum se har hukm ki tamil nahin ho pati
aasman chhin liya karta hai sara pani
aankh bharti hai magar jhil nahin ho pati
sham tak TuT ke har rose bikhar jata hun
yas ummid mein tabdil nahin ho pati
raat-bhar nind ke sahra mein bhaTakta hun magar
subh tak KHwab ki takmil nahin ho pati
Ghazal
Shairi ruh mein tahlil nahin ho pati
Shakeel Azmi