sannaTon ke jangal mein khoi hui KHushbu thi
aahaT jo suni koi sahmi hui KHushbu thi
us ghar mein gulabon se kuchh rag mahakte the
mahaul mein jadu tha gati hui KHushbu thi
guftar mein phulon ki barsat ka aalam tha
pahna hua gulshan tha oDhi hui KHushbu thi
Dali se koi mausam jiyun TuT ke gir jae
be-rabt hawaon mein uDti hui KHushbu thi
tum ne kabhi socha hai tum ne kabhi jaana hai
kahte hain 'tapish' jis ko bikhri hui KHushbu thi
Ghazal
SannaTon ke jangal mein khoi hui KHushbu thi
Moni Gopal Tapish