ruThe huon ko apne manane chale the hum
bigDi hui thi baat banane chale the hum
kya kahiye aasman tha wo ya zamin thi
jis par gulon ka naqsh biThane chale the hum
dekha unhen qarib se hum ne to ro diye
jin bastiyon ko aag lagane chale the hum
duniya ke naz dekh ke hairan rah gae
goya usi ke naz uThane chale the hum
viraniyon ne baDh ke gale se laga liya
le kar dilon mein kaise KHazane chale the hum
dekha jo aap apne liye ghair ho gae
ghairon ko aaina to dikhane chale the hum
Ghazal
RuThe huon ko apne manane chale the hum
Khurshid-ul-islam