ruh ko taDpa rahi hai un ki yaad
dard ban kar chha rahi hai un ki yaad
ishq se ghabra rahi hai un ki yaad
rukte rukte aa rahi hai un ki yaad
wo hanse wo zer-e-lab kuchh kah uThe
KHwab se dikhla rahi hai un ki yaad
main to KHuddari ka qail hun magar
kya karun phir aa rahi hai un ki yaad
ab KHayal-e-tark-e-rabt-o-zabt hai
KHud-baKHud sharma rahi hai un ki yaad
Ghazal
Ruh ko taDpa rahi hai unki yaad
Shakeel Badayuni