رندان بادہ نوش کی چھاگل اٹھا تو لا

رندان بادہ نوش کی چھاگل اٹھا تو لا
باد بہار دوڑ کے بادل اٹھا تو لا

آ عمر رفتہ حشر کے دم خم بھی دیکھ لیں
طوفان زندگی کی وہ ہلچل اٹھا تو لا

سر سے دیار غم کے سنیچر اتار دے
منگل ہے جس میں جا کے وہ جنگل اٹھا تو لا

لالچ بتا کے دور سے واعظ کا رنگ دیکھ
خالی ہی کیوں نہ ہو کوئی بوتل اٹھا تو لا

اے زندگی جنوں نہ سہی بے خودی سہی
تو کچھ بھی اپنی عقل سے پاگل اٹھا تو لا

آتی ہے یاد صبح مسرت کی بار بار
خورشید آتے آتے اسے کل اٹھا تو لا

کشتی ہے گھاٹ پر تو چلے کیوں نہ دور آج
کل بس چلے چلے نہ چلے چل اٹھا تو لا

ناطقؔ جنون خدمت احباب کس لیے
دیکھیں تو کیا ملا ہے تجھے پھل اٹھا تو لا