Raushni bhar KHala pe bar the hum

raushni bhar KHala pe bar the hum
dhund manzar pas-e-ghubar the hum

dhup mein aae to sukun mila
chhanw mein the to daghdar the hum

koi dastak na koi aahaT thi
muddaton wahm ke shikar the hum

but-gari mein hunar bhi shamil tha
sang-sazi se hoshiyar the hum

qarz koi bhi jism o jaan pe na tha
zindagi par magar udhaar the hum

zulmaten to charag-e-KHema thin
KHalwaton ke gunahgar the hum

fikr o mani talazme tashbih
ai ghazal tere jaan-nisar the hum

'rind' tha bekasi ka lutf ajib
ghar mein rah kar bhi be-dayar the hum