Rahguzaron mein raushni ke liye

rahguzaron mein raushni ke liye
le ke nikle hain aandhiyon mein diye

zaiqa talKH hai mohabbat ka
aadmi zahr-e-gham piye na piye

dil mein yaadon ke rat-jage jaise
TimTimate hun marghaTon ke diye

dil mein tufan hain chhupae hue
hum to baiThe hain apne honT siye

koi tujh sa nazar nahin aata
dil ne sau rang intiKHab kiye

dar-ba-dar shahr mein phire yaro
apne kandhe pe apni lash liye

dil ki dil mein rahen tamannaen
aankhon aankhon mein kitne ashk piye

jaan pyari hamein bhi thi 'ayyub'
apni KHatir magar kabhi na jiye