niyyat ho agar nek to deta hai KHuda bhi
karte hain amal log to milta hai sila bhi
baatin ki hararat se phunke jate hain tan-man
purwai bhi chalti hai barasti hai ghaTa bhi
chhu kar nahin guzri hai teri zulf-e-muattar
is bar to mahrum chali aai saba bhi
ek tum ho ki bichhDe to bichhaD hi gae hum se
milte hain bahut log to hote hain juda bhi
aadab-e-mohabbat the ki daman nahin chhoDa
tum dur na the dur na the band-e-qaba bhi
kis yas ke aalam mein hon kya jaaniye 'athar'
muddat hui aai nahin honTon pe dua bhi
Ghazal
Niyyat ho agar nek to deta hai KHuda bhi
athar shakeel