na jaan kar gul-e-bazi bahut uchhaal ke phenk
ye dil hai TuT na jae zara sambhaal ke phenk
sitam hai yun dil-e-pur-KHun diya uchhaal ke phenk
ki jis tarah koi de qahqahe gulal ke phenk
gahan se chand nikalta hai kis tarah dekhen
naqab ko ruKH-e-raushan se khol-khaal ke phenk
KHata kare na kahin dil pe ai kaman-abru
jo tir phenk yahan us ko dekh-bhaal ke phenk
wo mai pila hamein saqi ki rind muflis hain
subu-o-jam se talchhaT bhi jo khangal ke phenk
jo dard-e-dil se taDapta hun zabt kahta hai
jigar ko sine se pahlu se dil nikal ke phenk
talab kiya hai safed us ne farsh-e-pa-andaz
mah-e-do-hafta ne di chandni ujal ke phenk
sipar hui jo meri qabr ki siyah-kari
yad-e-karam ne diye chaar phul Dhaal ke phenk
wo bulbula dil-e-nazuk hai ai yam-e-KHubi
habab se bhi subuk-tar ise sambhaal ke phenk
sune se jis ke uDen hosh kabk-o-bulbul ke
wo likh ke sher ab ai 'shad' bol-chaal ke phenk
Ghazal
Na jaan kar gul-e-bazi bahut uchhaal ke phenk
Shad Lakhnavi