mustaqbil raushan-tar kahiye
lekin aankh mila kar kahiye
barbaadi ko manzar kahiye
kahiye soch samajh kar kahiye
samjhaya tha dekh ke chaliye
kaisi khai Thokar kahiye
dam ghuTne ki baat alag hai
tauq-e-gulu ko zewar kahiye
aansu hain qanun se bahar
gham ki baaten hans kar kahiye
aaina dikhlana hoga
sachchi baaten munh par kahiye
shaiKHi ki bhi had hoti hai
kab tak behtar behtar kahiye
Ghazal
Mustaqbil raushan-tar kahiye
Shaad Aarfi