murattab ho ke ek mahshar ghubar-e-dil se niklega
naya ek karwan gard-e-rah-e-manzil se niklega
hamare munh se aur shikwa tumhaara ho nahin sakta
tumhaara nam bhi shayad baDi mushkil se niklega
na hoga gosha-e-daman mera wabasta-e-manzil
na jab tak hath tera parda-e-manzil se niklega
meri aankhen hain bazm-e-rang-o-bu mein muntazir teri
nahin malum tu kab tak hijab-e-dil se niklega
main apne dil ko yun pesh-e-nazar 'simab' rakhta hun
ki mera chand jab nikla isi manzil se niklega
Ghazal
Murattab ho ke ek mahshar ghubar-e-dil se niklega
Seemab Akbarabadi