mumkin hai wo din aae ki duniya mujhe samjhe
lazim nahin har shaKHs hi achchha mujhe samjhe
hai koi yahan shahr mein aisa ki jise main
apna na kahun aur wo apna mujhe samjhe
har-chand mere sath rahe ahl-e-basirat
kuchh ahl-e-basirat the ki tanha mujhe samjhe
main aaj sar-e-atish-e-namrud khaDa hun
ab dekhiye ye KHalq-e-KHuda kya mujhe samjhe
Ghazal
Mumkin hai wo din aae ki duniya mujhe samjhe
Rasa Chughtai