manzilon tak manzilon ki aarzu rah jaegi
karwan thak jaen phir bhi justuju rah jaegi
ai dil-e-nadan tujhe bhi chahiye pas-e-adab
wo jo ruThe to adhuri guftugu rah jaegi
ghair ke aane na aane se bhala kya faeda
tum jo aa jao to meri aabru rah jaegi
is bhari mahfil mein teri ek main hi tishna-lab
saqiya kya KHwahish-e-jam-o-subu rah jaegi
hum agar mahrum honge ahl-e-fan ki dad se
sher kahne ki kise phir aarzu rah jaegi
Ghazal
Manzilon tak manzilon ki aarzu rah jaegi
Jamill Murassapuri