manzilon ko nazar mein rakkha hai
jab qadam rahguzar mein rakkha hai
ek hayula hai ghar KHarabi ka!
warna kya KHak ghar mein rakkha hai
hum ne husn-e-hazar-shewa ko
jalwa jalwa nazar mein rakkha hai
chahiye sirf himmat-e-parwaz
bagh to baal-o-par mein rakkha hai
haram-o-dair se alag hum ne
abhi ek sajda sar mein rakkha hai
meri himmat ne apni manzil ka
fasla rahguzar mein rakkha hai
raat din dhup chhanw ka aalam
kya tamasha nazar mein rakkha hai
Ghazal
Manzilon ko nazar mein rakkha hai
Tabish Dehlvi