منزل بے نشاں سے کیا حاصل
گم شدہ کارواں سے کیا حاصل
تنگ ہوتی زمیں کا ٹکڑا دے
وسعت آسماں سے کیا حاصل
کیا کریں جب کہ بجھ گئیں آنکھیں
رونق بے کراں سے کیا حاصل
داد خواہی کا حق بھی چھین لیا
اب کہ دارالاماں سے کیا حاصل
لمس رشتوں کا پائیں دیواریں
گھر عطا کر مکاں سے کیا حاصل
لٹ گئیں جب مری متاع حیات
دولت دیگراں سے کیا حاصل
نذر کر ذوقؔ سا فصیح سخن
ایسی کج مج زباں سے کیا حاصل
غزل
منزل بے نشاں سے کیا حاصل
صابر شاہ صابر